Para cantar... coma Raices combinadas

Fun ver a Matilda á súa casa e, para agradecerlle todo canto nos ensinou, leveille un álbum cos fotos da visita e un disco no que gravei as pists que xa publicamos neste blog. Ela, xenerosa coma decote, agasoullome unhas letrillas tradicionais que quero compartir con vós:
Aghora que ven o vran
alegría meus señores!
que anda a xente de fora
mirando pros labradores

Non bailes tanto con ela
que, anque está en casa ghrande,
paghan a renda por ela.

O meu amos vai no Rei,
Dios o aparte das balas!
Dios o deixe vir cumplir,
palabras que deixou dadas!

 Quérolle á miña nai
que lle debo de querer,
que me tivo nove meses
onde nadie me foi ver.

Non quero ir ó muiño,
 nin barrer no tremiñado,
que despois, no outro mundo,
piden contas do roubado.

Ala! A cantar!

Matilda: enredos e formación do grupo Raices Combinadas

Publicamos hoxe os dous últimos cortes da entrevista que lle fixemos en Febreiro a Matilda de Limiñoa. O podcast completo. Temos moito mási material pois o encontro prolongouse máis dunha hora pero, de momento abonda. Nesta ocasión escollemos cortes nos que Matilda nos propón algúns enredos (e cos que rimos moito!) e outro no que nos explica como se chegou á formación do grupo que hoxe teñen. Grazas de novo a esta muller animosa, forte, admirable... por canto nos ensinou e por facelo dun xeito tan, tan didáctico e ameno.

Matilde 2: A escola. Raices combinadas

Velaí a Matilde, agora falándonos do seu tempo escolar.